Вельконоцни концерт у Дюрдьове

май 2016
 
ДЮРДЬОВ – У Велькей сали Задружного дому у Дюрдьове внєдзелю вечар, 1. мая,  пред полну салу з патрачами аматере домашнього КУД „Тарас Шевченко” отримали традицийни Рочни Вельконоцни концерт.

У програми участвовали вецей секциї Дружтва, та аж 28 точки виведли ґрупи и солисти рижних возростох, котри шпивали, танцовали, рецитовали и грали, а  векшина точкох виведзена премиєрно.

Учашнїкох пририхтали уметнїцки руководителє Дружтва Михал Лїкар, Сенка Станкович, Яким Гарди, Саня и Микола Хромишово, Тамара Салаґ и Мария Хромиш, та учителька Єлена Салаґ и наставнїца руского язика Мария Самарджич з дюрдьовскей ОШ. Програму водзели Тарас Чапко и Катарина Гарди, конфернсу написал Яким Чапко, а сценоґрафию обдумал креативни тим младежи КУД.

У мено КУД присутних привитал и вельконоцни швета повинчовал предсидатель Скупштини Дружтва Мирослав Чакан, а на Велкьконоцним концерту присуствовали предсидатель Националного совиту (НС) Руснацох Славко Рац, народна посланїца и членїца НС Олена Папуґа, предсидателька Совиту Месней заєднїци Дюрдьов Леона Виславски, директорка дюрдьовскей ОШ Мария Тртич и о. Борис Холошняй.

Патраче з моцнима аплаузами наградзовали аматерох, а наймоцнєйши достали фолклорни секциї – од наймладшей по настарши ґрупи, хтори виведли нови танци.  Виводзацка фолклорна секция перши раз наступела и у новим народним облєчиве.

По двогодзиновим концерту у просторийох Дружтва пририхтана заєднїцка пасхална вечера, як и друженє госцох и аматерох.

Ruske Slovo

ДЮРДЬОВ – Чолнїки Националного совиту (НС) Руснацох пондзелок, 6. юлия, нащивели Подручну канцеларию (ПК) у Дюрдьове, чийо шедзиско у КУД „Тарас Шевченко”, дзе з членми єй Координациї бешедовали о вецей сеґментох роботи, значней за руску заєднїцу у Дюрдьове.

На сходзе у Дюрдьове були предсидатель НС Руснацох Славко Рац, предсидатель Вивершного одбору НС Желько Ковач, предсидателька Одбору за културу Ґабриєла Саянкович и секретар НС Таня Арва Планчак, з котрима бешедовали координатор ПК Мирон Сабадош, та члени Єлена Салак, задлужена за образованє, Мирослав Чакан, задлужени за демоґрафию, Ивана Тиркайла, задлужена за службене хаснованє язика и писма, Геленка Корпаш, задлужена за информованє и Борис Цап, задлужени за роботу младих. На схадзки бул и предсидатель дюрдьовского Дружтва Микола Кухар и руководителє секцийох.

Найвецей бешедоване о образованю, односно о мирох як застановиц гашенє руского оддзелєня у ОШ, хторе нє будзе оформене други рок за шором.

У обласци култури визначена потреба за семинарами пре фахове усовершованє уметнїцких руководительох секцийох, а у обласци службеного хаснованя язика и писма як проблем наглашене же у Општини Жабель нєт толмача за руски язик.

И представителє Координациї ПК и чолнїки НС ше зложели же КУД „Тарас Шевченко” добре и континуовано роби, а Дюрдьовчанє заступени на шицких наших манифестацийох и фестивалох.

- Анґажованосц обачлїва, и тот позитивни тренд и способ роботи треба применїц и у других наших дружтвох, же бизме им помогли з позитивним прикладом, но зоз свидомосцу же кажди наш штредок окремни – гварел предсидатель НС Руснацох Славко Рац, док координатор ПК Мирон Сабадош указал и на ситуацию же за дальше функционованє Дружтва потребна фахова особа котра би водзела документацию, а на тот способ би ше предлужело, можебуц и злєпшало роботу КУД, та и ПК у Дюрьове.

Izvor: Ruske Slovo

ДЮРДЬОВ - У дюрдьовским хотаре єшеньска шатва у полним розмаху, медзитим, пре скорейши вельо и части дижджи, хтори спомалшели жатву сої и ламачку кукурици, єшеньска шатва будзе тирвац длужей.

Оптимални термин за шатву жита прешол, а шатва пожнї и прето же парасти керую оранє и пририхтованє жеми за шаце, алє шею до тарчованого, з чим шпорую пенєж.

Векшина за шатву хаснує свойо доробене нашенє, а лєм мале число продуковательох ше одлучує за декларовани сорти.

По оценох парастох, зоз житом того року буду зашати лєм 15 одсто поверхносци дюрдьовского хотару, док єшеньски ярец шею лєм даєдни парасти, за карменє статку.

Izvor: ruthenpress.info

ДЮРДЬОВ - Вчера, у 11. колє Медзиопштинскей фодбалскей лиґи Вербас-Жабель-Титель, ФК Бачка з Дюрдьова страцела од першопласованого Милетичу зоз 4:1.

Чол за Бачку дал Боґданов и єшеньску часц закончела на 4. месце на таблїчки.

Izvor: ruthenpress.info

GOSPODJINCI

Go to top